Munosabat: Aholiga qulay shart-sharoitlar yaratish maqsadida Oqdaryo dehqon bozori oldi tartibga keltirilmoqda

Samarqand viloyat hokimligi axborot xizmatining so‘rovida Oqdaryo tumani, Loyish shaharchasi, Amir Temur shoh ko‘chasida yo‘l chetidagi yashil hudud hamda piyodalar yo‘lakchasi tuman hokimining og‘zaki yoki ichki buyrug‘i bilan tadbirkor tomonidan betonlashtirilib, avtoturargoh tashkil etilayotganligi aytilgan.

Mazkur holat yuzasidan shuni ma’lum  qilamizki, Oqdaryo tuman markazi Loyish shaharchasi Amir Temur ko‘chasida joylashgan dehqon bozori ro‘parasida avtoturargoh yo‘qligi bois bir necha yillardan buyon Samarqand shahriga hamda tumanning 15 dan ortiq mahallalariga qatnovchi transport  vositalari tartibsizliklarni yuzaga keltirib, yo‘lning qatnov qismida transport vositalari harakatlanishiga qiyinchiliklarni keltirayotgan edi. Shuningdek, bozor chetida joylashgan do‘kon egalari do‘kon va yo‘l o‘rtasidagi maydonlarni o‘zboshimchalik bilan egallab olib, turli fuqarolarga ijaraga berish orqali ko‘cha savdosini tashkil etganligi va natijada fuqarolar harakatlanishiga qiyinchiliklar tug‘dirib, yo‘l chetidagi beton ariqlarga muntazam ravishda maishiy chiqindilar tashlash holati kuzatildi. Tegishli chora-tadbirlar olib borilishiga qaramasdan, piyodalar va haydovchilar tomonidan payxon qilinaverganligi bois yo‘l chetidagi yashil hududni obodonlashtirishni imkoni bo‘lmadi. Mazkur muammolar bir necha marotaba ijtimoiy tarmoqlarda ham tanqid ostiga olindi. 
Yuqorida ko‘rsatilgan muammolarni  bartaraf etish, fuqarolarga hamda avtotransport vositalari qatnoviga qulaylik hamda shart-sharoitlar yaratish maqsadida keng jamoatchilik fikridan kelib chiqqan holda tegishli mas’ul biriktirilib, hududda vaqtinchalik avtoturargoh tashkil etish, hududni tartibga keltirish, piyodalar qatnovi uchun yo‘laklarni tashkil etish va noqonuniy savdo shaxobchalarini bartaraf etish borasida chora-tadbirlar tizimli ravishda amalga oshirilmoqda. Olib borilayotgan qurilish ishlari jarayonida birorta ham daraxtga zarar yetkazilgani yo‘q.
Mazkur islohotlar natijasida hudud to‘liq tartibga olingach, Yo‘l harakati xavfsizligi boshqarmasi va Transport nazorat inspeksiyasi xodimlari tomonidan “nelegal” taksilar faoliyatini nazoratga olish va hududda noqonuniy faoliyat olib boruvchi taksilar faoliyatiga chek qo‘yish masalasi ham ko‘zda tutilgan.

Oqdaryo tuman hokimligi axborot xizmati