OQDARYODA “MUVAFFAQIYATLI ISLOHOTLAR - YUQORI NATIJALAR” MAVZUSIDA SEMINAR-TRENING O‘Z ISHINI BOSHLADI

Bugun Ixtisoslashtirilgan ta’lim muassasalari agentligi tizimidagi Oqdaryo tuman ixtisoslashtirilgan maktabida Singapurning “MARSHALL CAVENDISH EDUCATION” tashkiloti bilan hamkorlikda o‘tkazilishi rejalashtirilgan “Muvaffaqiyatli islohotlar – yuqori natijalar” mavzusidagi o‘quv-seminarining ochilish marosimi bo‘lib o‘tdi.
Unda Oqdaryo tuman hokimi Sherzod Qudratov so‘zga chiqib, keyingi yillarda mamlakatimizda ta’lim tizimi xodimlari oldida turgan ustuvor vazifalar, mavjud muammolar va ularning yechimlari  xususida so‘z yuritdi va xalqaro tajribalar asosida ustozlarning malakalari oshirilishi ijobiy natijalar berishini qayd etdi. 
Seminarda tumandagi 56 ta umumiy o‘rta ta’lim maktablari direktorlari uchun aniq va tabiiy fanlar yo‘nalishida “Zamonaviy ta’limning tuzilishi”, “Singapur ta’lim tizimining kuchli tomonlari”, “Istiqbolli o‘quv dasturi”, “Mening maktabim uchun XXI asr natijalarini aniqlash” va boshqa mavzularda mahorat darslari tashkil etiladi. 
Mazkur o‘quv-seminar 4 kun davom etadi va uning davomida qatnashchilar ta’lim tizimini rivojlantirish, o‘qitish metodologiyalari va boshqaruv jarayonlarini takomillashtirish bo‘yicha xalqaro tajribalar bilan tanishadi. Ushbu seminarning asosiy maqsadi – tuman darajasidagi ta'lim muassasalarida yuqori natijalarga erishish uchun zarur bo‘lgan bilim va ko‘nikmalarni shakllantirishdir.