Оқдарё туман ҳокими Шерзод Қудратовнинг Ўзбекистон Республикаси Давлат Мустақиллигининг 34 йиллиги муносабати билан туман халқига байрам табриги

Ассалому алайкум азиз оқдарёликлар!

Сизларни энг улуғ ва энг азиз байрамимиз - Ўзбекистон Республикаси Давлат Мустақиллигининг 34 йиллиги билан самимий муборакбод этаман!

Биз учун ҳақиқатан ҳам энг улуғ, энг азиз айём бўлган бу қутлуғ сана ўтган тарихан қисқа даврда босиб ўтган ғоят оғир ва мураккаб, шу билан бирга, шарафли йўлимизни, амалга оширган кенг кўламли ислоҳотларимиз самарасини, қўлга киритган улкан марра ва ютуқларимизни сарҳисоб қилиш, олдимизга қўйган олий мақсад - энг тараққий топган давлатлар қаторига кириш борасидаги устувор вазифаларни белгилаб олишда, ҳеч шубҳасиз, муҳим аҳамият касб этади.

Мамлакатимиз мустақиллигининг ўтаётган 34 йили давлатимиз ва халқимиз ҳаётида кенг кўламли ислоҳотлар, улкан янгиланиш ва бунёдкорлик ишлари амалга оширилган давр сифатида тарих зарварақларидан жой олди. Мустақиллик ва тинчлик деган энг улуғ неъмат халқимизга озод ҳаётни бериш билан қадр-қимматимизни тиклади, тилимиз, муқаддас динимиз ва урф-одатларимизни қайтариб берди. Жорий йилнинг 10 июль куни Муҳтарам Юртбошимизнинг “Ўзбекистон Республикаси давлат мустақиллигининг ўттиз тўрт йиллик байрамига тайёргарлик кўриш ва уни ўтказиш тўғрисида”ги қарори эълон қилинди. Қарордаги “Ватан учун, миллат учун, халқ учун” деган эзгу ғояни ўзида мужассам этган кенг маъноли шиорда, мазкур қарорнинг мазмун-моҳияти акс этганлигини кўмоқдамиз.

Қадрли дўстлар!

Туманимизнинг 178 минг нафар аҳолисининг меҳнаткаш қатлами “Ўзбекистон – менинг Ватаним” -деб, турли соҳаларда юрт равнақи йўлида кенг қамровли ишларни амалга оширишда фаол қатнашмоқдалар.

Оқдарё тумани қишлоқ хўжалиги ва саноат маҳсулотлари ишлаб чиқаришга ихтисослашган бўлиб, 2025-йилда 76.4 минг т. ғалла ва 368,0 т. ипак хом ашёси топшириб, режани ортиғи билан бажарди.

Тумандаги 29 та экспортёр корхоналарида жорий январ-август ойлари 21,4 млн долларлик саноат ва қишлоқ хўжалиги маҳсулотлари экспорт қилинди. Экспорт географияси кенгайтирилиб тумандан илк бор Нидерландия, Италия, Бразилия давлатларига экспорт амалга оширилди. Йил якунигача яна янги бозорлар жумладан Австралия, Бангладеш, Чили каби давлатларга маҳсулотларимизни экспорт қилишни режалаштирганмиз.

Жорий йилнинг 6 ойи давомида туманимизга 25.6 млн. АҚШ доллар миқдорида хорижий инвестиция киритилди.

Йил якунига қадар хорижий инвестициялар ҳажмни 65 млн доллардан оширишни режалаштирганмиз. Бунда хорижий давлатларга жумладан, Хитой Халқ Республикасига хорижий сафарларда имзоланган меморандумлар доирасида 100 млн доллардан ортиқ лойиҳалар портфели шакллантирилган. Келгусида мазкур лойиҳалар билан эришилган келишув лойиҳаларини амалга ошириш ҳисобига инвестициялар ўзлаштирилади. Бундан ташқари, туманда фаолият кўрсатаётган, Россия, Жанубий Корея, Қозоғистон, Нидерландия инвестициялари иштирокидаги корхоналар билан ҳам самарали ишлаб, қўшимча инвестициялар жалб қилиб борилади.

Ижтимоий соҳага эътибор қаратилиши натижасида халқимизнинг ишончи мустаҳкамланиб, турмуш даражаси янада яхшиланмоқда. Бунга охирги 6 ой давомида амалга оширилган ишларни мисол қилиб келтиришимиз мумкин.

Бу йил ҳисобига Умумфойдаланувдаги автомобиль йўлларининг 199 км да жорий таъмирлаш ишлари бажарилди. Миёнқол МФЙ Ғулва ва Оқбўйра қишлоқлари ички йўлларининг 5,7 км қисмида ҳамда Истиқлол маҳалласи Равот қишлоғи ички йўлларнинг 2,6 км қисмига асфальтобетон қопламаси ётқизиш ишлари амалга оширлди.

Тумандаги Ўзбекистон маҳалласидаги 13-боғча, Бошдархон маҳалласидаги 42-мактаб, ҳамда Олчинтепа, маҳалласидаги Олчинтепа ОШП  ҚВП биноларини реконструкция қилиш, 2 та умумтаълим мактабларини мукаммал таъмирлаш ишлари поёнига етказилмоқда.

Туман Тиббиёт бирлашмасида аҳолига қулай шароит яратиш мақсадида, Очиқ бюджет лойиҳасининг 1-босқичида ғолиб бўлиб, 2,745 миллиард сумга 16 турдаги тиббий асбоб ускуналар харид қилинган. Бундан ташқари, тиббий суғурта тизимларини туманга тўлиқ жорий этиш билан бирга, тиббиёт тизимини рақамлаштириш учун 243 дона компютер жамланмалари харид қилинди.

Туман тиббиёт бирлашмасининг қурилиши тугалланмаган маъмурият, реанимация ва режали жарроҳлик бўлимлари, ошхона, зарарсизлантириш бўлими учун ёрдамчи биноларини қурилишини тугаллаш учун Республика марказлашган маблағлар ҳисобидан 10 млрд сўм маблағ ажратилди.

Туманда таълим сифатини ошириш, ўқувчилар учун шарт шароитлар яратиш мақсадида, 2025 йилда давлат дастурига тумандаги 3 та (Бошдархон, Миёнқол маҳаллаларида 210 ўринли, Наврўз маҳалласида 600 ўринли, Ўзбекистон маҳалласида 120 ўринли мактаб ва мактабгача таълим ташкилотларига қўшимча янги бино қуриш ишлари жадал олиб борилмоқда.

Туманда мактабгача таълим билан қамраб олиш кўрсаткичи 82.1 фоизни ташкил этмоқда.

Бугунги кунда туманимизни сифатли электр энегияси билан таъминлаш бўйича Олчинтепа, Ўзбекистон, Учтепа маҳаллаларига 570 дона бетон устунлар ўрнатилиб, электр энергия билан боғлиқ муоммолар бартараф этилмоқда.

Ҳурматли дўстлар!

Катта ният орзусида меҳнат қилаётган деҳқонларимиз ҳам пахта етиштиришда ўз олдиларига қўйган режаларни уддалаб, Ватанимиз ва халқимиз олдида юзлари ёруғ бўладилар деб умид қиламиз. Қишлоқ хўжалигида амалга оширилаётган иқтисодий ислоҳотлар натижасида аҳолининг ерга бўлган муносабати тубдан ўзгарди. Шу боис аҳоли хонадонларининг ҳар бирини тадбиркорга айлантириш эвазига бугунги кунда аҳолимиз томонидан чорво, парранда, иссиқхоналар қуришга эътибор ошди.

Азиз тумандошлар!

Мустақиллик байрами халқимизнинг ҳақиқий байрами, энг азиз, энг мўътабар ва энг севимли байрами бўлиб қолаверсин. Туманимизнинг, сўзи билан иши бир бўлган мард фидойи деҳқонларию-ғаллакорларини, боғбону-пиллакорларини, зиёлию-хизматчиларини, ёшларимизни, барча туманимиз аҳлини Мустақиллигининг 34 йиллик тўйи билан самимий муборакбод этаман. Сизларга она Ватанимиз равнақи йўлида олиб борилаётган бунёдкорлик ишларингизда каттадан-катта муваффақиятлар, ўзларингизга мустаҳкам сиҳат-саломатлик, хонадонларингизга файзу-барака, тинчлик-тотувлик тилайман. Серқуёш Ўзбекистонимиз осмони мусаффо, бағри кенг халқимиз турмуши янада фаровон ва гўзал бўлаверсин.

Истиқлол байрамингиз муборак бўлсин, азизлар!